Կիրակի 6 Նոյեմբեր 2011-ին, Փարիզի Ս. Յովհաննէս Մկրտիչ Մայր եկեղեցւոյ մէջ պատշաճ կերպով նշուեցան Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի ծննդեան 60-րդ եւ գահակալութեան 12-րդ տարեդարձները։

Փարիզի հոգեւոր հովիւ Տ. Պարթեւ Աբեղայ Բարսեղեան իր քարոզին մէջ անդրադարձաւ Վեհափառ Հայրապետի կենսագրական գիծերուն, 12 տարուան ընդգրկուն գործունէութեան եւ բեղմնաւոր իրագործումներուն։ Ան յորդորեց, որ Վեհափառ Հայրապետի այս տարեդարձներուն առթիւ մեր մեծագոյն նուէրը ըլլայ մեր քրիստոնէական կենցաղը եւ ազգային արժէքներու հանդէպ նախանձախնդրութիւնը, ինչպէս նաեւ մեր որդիական սէրն ու ակնածանքը Նորին Սրբութեան հանդէպ։

Քարոզէն ետք տեղի ունեցաւ Հայրապետական Մաղթանք՝ Հայոց Հովուապետի կենաց արեւշատութեան եւ Հայ Եկեղեցւոյ անսասանութեան համար։

Պատարագէն ետք ժողովուրդը հաւաքուեցաւ եկեղեցւոյ «Նուրհան Ֆրէնկեան» սրահը, ուր Տիկնանց Յանձնախումբը պատշաճ հիւրասիրութիւն մը պատրաստած էր։ Ներկայ էին Թեմական Խորհուրդի Ատենապետ Պրն. Փաթրիս Ճօլօլեան, եկեղեցւոյ հոգաբարձութեան Ատենապետ Պրն. Գեղամ Թորոսեան, Ծխական Խորհուրդի, Հոգաբարձութեան եւ Տիկնանց Յանձնախումբի անդամներ։

Հայր Պարթեւ խօսք առնելով բացատրեց օրուան տօնակատարութեան իմաստը։ Ըսաւ՝ որ այս առթիւ կազմակերպուած միջոցառումներուն մասնակցելու համար արդէն Ս. Էջմիածին կը գտնուէին Ֆրանսայի Թեմի բարեջան Առաջնորդ Գերշ. Տ. Նորվան Արք. Զաքարեան եւ Փարիզի Ծխական Խորհուրդի Ատենապետ Տիկ. Թամարա Քոչարեան։ Հայր Սուրբը կոչ ուղղեց, որ բոլորս միասին հոգեպէս եւ մտովի կապուինք Ս. Էջմիածնի հետ եւ ի խորոց սրտի շնորհաւորենք Վեհափառ Հայրապետը, մաղթելով՝ որ Աստուած օրհնէ Նորին Սրբութեանեռանդն ու ջանքերը, որոնք ուղղուած են մեր եկեղեցւոյ առաքելութեան արդիւնաւորման եւ մեր եկեղեցւոյ կեանքի առաւել ճիշդ եւ արդիւնաւոր կազմակերպման նպատակին։

Ապա Հայր Սուրբին առաջարկով ներկաները իրենց բաժակները բարձրացուցին խմելու համար Վեհափառ Հայրապետի կենացը։ Եկեղեցւոյ երգչախումբը ժողովուրդի ձայնակցութեամբ ծաղկեցուց բարձրացուած կենացը՝ «Ամէն Հայի սրտից բխած» հայրապետական մաղթերգով։

Թղթակից